එරබදු මල් පොට්ටු නැතත් අවුරුද්දත් වෙච්චි කිට්ටු
සිත් සතොසින් සමඟි වෙලා අමතක කර පරණ වෙට්ටු
අලුත් හැඟුම්, අලුත් පැතුම් කරන්ට පෙර හදට තට්ටු
මහ හබයෙක නොවැ පැටළුනේ සිරි ලංකා දීපේ රට්ටු

අයන්න නැකතටම ලියල නැකතට බත් කටක් කාපු
මල්වර නැකතටම නාල නැකතට පෝරුවෙත් නැගපු
වැඩිය නෙවෙයි කසාදෙටත් අත්සන නැකතට ගසාපු
මාව උණත් වැටුනෙ අමාරුවක නෙවෙයි ලේසි පාසු

රෑත් නැකැත් උදෙත් නැකැත් පුදුම රාශි මාරුවක්ය
තමන් හදපු නැකත හරිය නැකත් කමිටු යුද්ධයක්ය
ප්‍රායෝගික බව කියලා එකක් ලෝකේ තියෙනවාය
සිරිත් විරිත් අපේ සිංහල ඉදිරියටත් යාම යුතුය

සමහරු සමරන්නේ නැතිලු සමහරු තෝරයි වෙලාව
පහසු දෙයක් කෙරුම තමයි කොයි කවදත් හොඳ කලාව
මොළෙන් තමයි රැකිය යුත්තේ රට ජාතිය සංස්කෘතිය
තමන් කැමති හොඳ වෙලේක සමරමු අවුරුදු උදාව