සත්‍ය සැමදා කුරුසියේ
2024-April
හෝසන්නා හෝසන්නා කියූ උන්මයි වටවෙලා
කීවෙ කුරුසිය ඇණ ගසව් යැයි යද්දි සතියක් ගතවෙලා
සේදුමුත් අත තීන්දුව දී වැරදි බව දැන එකහෙලා
හෙරෝද්ලා නැහැ ගියේ එල්ලුම් ගහට නීතිය යටවෙලා
බරබ්බස්ලා ජුදාස්ලා හෙම ලබා නිදහස හිනැහිලා
සිටින ලෝකෙක සත්‍යයයි බිළිවුණේ කවදත් කොටුවෙලා
එදත් නායක පූජකයො රැළ සිටියෙ බලයට ලොබවෙලා
වගෙයි අදටත් දනා හැමවිට ගියේ රැල්ලට රැවටිලා
අයුක්තිය හා අසාධාරණෙ දැක දැකත් හිඳ නැවතිලා
මඩින විට අනෙ අපෝ කියමින් නොගොස් එරෙහිව නැගිටලා
නොසිට යුතු වග තවත් නිහඬව අන්ධ බිහිරිව ගොළුවෙලා
සමිඳු ජේසුන් කියා දුන්නේ කුරුසියක් මත බිලිවෙලා
අදත් කවදත් එකම දේමයි වෙන්නෙ ලොව යන කැරකිලා
ගෙනත් වධදී මරණ එක නැහැ වෙනස් හරි උන් බලබලා
කොතෙක් පෙනුනත් මෙයයි වියයුතු වෙනවගක් නෑ සිදුවෙලා
ජේසු කුරුසියෙ දැනුත් එල්ලී වේදනාවෙන් මිරිකිලා