Author; හෂාන් සම්පත් සමනලවත්ත

සුරතල් තෙපුල් කටකාරය තොරක් නැතී
දුව පැන නටයි බිඳුවක්වත් නොවෙයි හතී
දෙවියන් දුන් තිළිණයකි මට ලොවක් වෙතී
එය රැක් ගැන්ම වගකීමක් නොවෙද නිතී

තුරුලට වෙලා සිටි සුරතල් බට්ටිච්චී
ළඟ නොමැතිව උන්නු දවසක් නැත නිච්චී
පැහැදිලි යමක් නැත මෙතනත් සිදු වෙච්චී
හෙමිහිට දුරස් කෙ‍රූවේ ඇයි අප්පච්චී

හැකි තව කලක් යුග නෙත් සේ රැක ගන්න
සුරතල් කරන්නට දෝතට අරගන්න
හිතටත් වාරු නැත නුඹ නොමැතිව ඉන්න
බඹරුණි නොමැත මල්, ආවට රොන් ගන්න

මල් ඇති තැන රුවය වුව ගල් තලාවක්
ලොව කොයි දෙයක ඇත සුන්දර කලාවක්
කිම කැඩපතක් ළඟ අද වැඩි වෙලාවක්
මහ වැස්සකට දෝ මේ කළු වළාවක්

ප්‍රීතිය පමණි ගෙයි හැම අතකම බැළුව
නුහුරුය නුපුරුදුයි ඉණ වට බැදි සළුව
කඳුලැලි නොවුනු මුත් නෙතඟින බිම හෙළුව
මට මහ දුකක් ලොකු දුවගේ කොටහළුව