නිවසේ මව්පිය අහිමිව ගියදා
බැලුවේ සොයුරිය පමණයි සැමදා
බාධක ඇතිමුත් එය හැම පරදා
ඇයගේ සෙනෙහස ලැබ දුනි විහිදා

ඉගනුම අහකට විසිකර ලන්නී
මුළුතැන් ගෙයටම වයසට යන්නී
දැළිකුණු තැවරුණු පිලි ඇඟ ලන්නී
රසබර කෑමත් සකසා දෙන්නී

අක්කා සොයුරන් සොයුරිය බලලා
උන්හට යන්නට මංපෙත හදලා
ඇත්තෙම සතුටක් ඇය හට දැනිලා
නෙත් අග කඳුලැළි බිඳුවක් රැඳිලා

නිල්වන් වරලස සුදුවට හැරිලා
දත් ටික සේරම නැහැ දැන් හැලිලා
සුන්දර පෙනුමත් මුහුනේ මැකිලා
අක්කා හොඳටම වයසට ඇදිලා

තම දිවි කැපකර නොගොසින් දීගේ
වැඩිමල් සොයුරියො සිටි මුත් කාගේ
බෑලුවයි අවසන රූපය ඈගේ
කාලය ගෙවිලා නොදැනුනි ඈගේ

-ලුෂානි දමයන්ති-
කැකිරාව