ලෙච්චමි මොකද අද වත්තේ වැඩ නැත්තේ
කාකි ඇඳුම් ඇයි වැසිකිළි වළ පැත්තේ
බිළිඳිය කෙලෙස සිය පණ නළ නහ ගත්තේ
තනි උඹ මොටද වින්නඹු කමකට බැස්සේ

අයියෝ සාමි කිය කිය වයසක ගෑනු
වියලුණු දෙතනෙ පුරවන් කිරි කෑ ගාතී
ඔහෙ බිම බලා ගෙන නියගින් මැටි හෑරූ
ලෙච්චමි කියාපන් නොහඩන්නට හේතූ

පසු දින උදෙත් ඒ මණියම හඬ ගෑවා
කූඩෙක අඩුව වැහුමට කූඩත් ආවා
හවසට මණියෙ හඬ තේ කූඩත් බෑවා
වැඩ නිම වෙන්න පෙර කංකානිත් නෑවා

අප්පෙක් නැතුව දරුවෙක් හදනට පේවී
බැරි වී කූවුවක සිර ගත විණි "පාවී"
කොහේ හෝ සැඟව ඈ කිරි බර මුදවාවී
පත්තර අකුරු උඹ කුරුසෙට දක්කාවී

මැදියම් රැයේ සාඩින් පැක් වී නිදන
වාට්ටුවකි රෑ දරු නැළවිළි ඇසෙන
බිළිඳිය හිනා වෙනවලු කිරි බොන අතර
දල්ලක් වන්න බෑ කිව්වලු මඟ නිදන