දෙවියන් සමග සටන් කරමි
2023-April
දෙවියන්ට අයිති
මහාර්ඝ වස්තුවක්
දෙවියන්ගේ දෙවොලින්
හදේ සගවා ගතිමි
සිහිල් සද දිදුලන
මකරන්ද පොකුණක
දෙවියන්ගේ උයනින්
පල සොරාගත්තෙමි
ලෝකයේ ඇස් වැසූවත්
මගේ හුස්මක් පාසා
දෙවියන් මා දකින බව
නිසැකවම දනිමි
ගිරි දුර්ග පිරුණු
කටුක මාවතක
දෙවියන්ගේ උදහසින්
සැගවී පලා යන්නෙමි
එහෙත් කිසි මොහොතක
ආපසු නොහැරෙමි
මිනිස් දුවක් විලස
දෙවියන් හා සටන් වදිමි
කල්පයක් කල්පයක් පාසා
ආදම්ගේ ඉලඇටයෙන් මැවූයේ
නොනැමෙන කැරලි ගසන්නියක් බව
දෙවියන්ට පෙන්වමි