නික්මන
2023-February
දරාගත නොහැකි තැන
නුඹේ මුනිවත ළඟ
නැගෙන තුස් සුන් හැඟුම්
මහද
වාන් දොර හැර දමමි
දැන දැනම
තැලෙන බැව්
අප දෙහදෙ
සිතුම් වැලි ඉවුර
රිදෙන බැව් දනිමි මම
මටත් වැඩියෙන් නුඹට
එබැවින්ම නික්ම යමි සබඳ
අත් නොහැර ඒ මිහිරි මතක
නුඹේ තනි නොතනියට
මගේ තනි නොතනියට
අතීතය වේ නිතර ළඟම
සැඟවගමු යළිත්
පොත් අතර
බලනු මැන ඉඳහිට හෝ
ඈත කඳුකරය දෙස
සඳ පහන් රෑ මැදක තනිව
නිවි නිවී දැල්වේවි
මගේ නිවහනෙ පහන්
කුරුටු ගාමින් ගෙවන රැයක..