චංචල දෑස මුවා කළ තල්අතු වැට අතරින්
පින්කළ මගේ දෑස ඇයි මෙතරම් කලබලයෙන්
සිංහල සිංදුවකට සැලෙන නිතඹ දැක රහසින්
මංකළ වරද කිමද නොබලන් මා දෙස තරහින්

පෙම්බර සිතක පැතුම් බොඳ වෙන්නට නොදී ඉතින්
ගින්දර නොදී තවත් තල්වැට පැන හනික වරෙන්
ගම්දොර බලාහිඳී පිළිගන්නට තොරණ බැඳන්
සුන්දර තංගමනී එන නළලේ තිලක තියන්

චන්දන කොකුම් උලා පළඳා රන් තෝඩු සවන්
නදදෙන මෘදංග ගැටබෙර වැයෙනා තාල හඬින්
අතගෙන දෙපිය නගන පොල්රුප්පාවට ඉහළින්
පියඹන සියොතුන් ගී ගයයි ඇවිත් උතුරු දෙසින්