වසා දමමු එ. ජා සංගමය
එයින් දැන්නම් පලක් නැත
මහ බලවතාගෙ නිෂේධ බලයට
යටපත් කරයි හැමවිට මිනිස්කම
මානව හිමිකම් කවුන්සිලය ද
වසා දැමුවට කමක් නම් නැත
නිර්දේශ ඉල්ලීම් නියෝග මත
දැන් උන් ගණන් ගන්නේ ද නැත
යුද අපරාධ උසාවිය හේග් වල
වසා දමමූ සදහට
දෙන තීන්දු තීරණ නිසිලෙස
සමූල ඝාතකයන් පිළිගන්නේද නැත.

අරාබි එකමුතු සංගමෙත්
වසා දමමූ අද හෙට
උන්ගේ එකමුතුව තිබුනානම් අද
මේ අපරාදෙ සිදුවන්නේ ද නැත
යුරෝපා සංගමය කොහෙද අද
අඳ ගොළු බිහිරි මඩමක් මිස
ඉයස් සර් කියමින් මහ එකාටම
උනුත් විකුණන්නෙ ආයුධ තරගෙට.

සමූලගාතනේ වසරක් පුරාවට
දරු දැරියන් අත දරුවන් කොපමණ ද
ඇයි දෙවියනේ නොපෙනෙයි ද නුඹලාටවත් මෙය
පාණ්ඩුකම්බල අසුන රත් වෙන්නේ නැද්ද අද.