දත යුතු කරුණු ගොමුව - 19
ඇත් රජ

382. සමනල කුමර සුහදාණෙනි ගමනෙ යන
දරදඩු ජව බලැති අණසක අණසක පැවති තැන
ඇස දුටු පමණකින් ගත සළිත ව නැමෙන
ගැමි දන අදත් බිය වෙත කියුමට එ ගැන

383. නිම නැති කතා ඇත වට කර මෙ දිසා වේ
යන්නට ඇරයුමයි ඊළග ඉම සී වේ
ඇත් රද පොරය ඇති වුණු තැන සීමා වේ
නොසොයා ගියොත් පල නැහැ අඩුවක් හා වේ

384. මෙ තැනත් දිසාවගෙ බල - තල තිබූ තැනයි
අලියන් - ඇතුන් කොටු කරගෙන තැබූ තැනයි
රට වුන් ඇවිත් “පාරට්ටුව” දැමූ වගයි
රදලුන් ධන බලය නතුකොට තැබූ බිමයි

385. සමනල රද නොරැදි තැන-තැන එක එල්ලේ
පහළට යන්න පියඹා වන පත් පල්ලේ
පසු කර ඇඹිලිපිටි - පදලංගල ගොල්ලේ
පනහමුර තිබේ රක්වානට එල්ලේ

386. මෙ පුරේ හස්තියකු ගැන අප පොඩි කාලේ
කියවා තිබේ මතක ද සමනල් රාලේ
නමටත් හේතු වුණි දැයි කළ මුර ලීලේ
පවසන් සමනලුනි හිතවත එහි තාලේ

387. කොපමණ වෙහෙස වී උන් වටකොට කැන්දා
අපමණ දුක් දුනි ද පා යදමක රන්දා
නොපෙනෙන පරිදි මහ වන මැද කොටු බන්දා
ගෙන දුන් මුදල් මත්තෙහි සිතුවම් ඇන්දා

388. අද නොව අලි- ඇතුන් පණ නැසු ඒ කාලෙත්
වෙ ද වෙනසකට මුල් තැන දී මේ කාලෙත්
රද හදවත නොමැති අලි- ඇතුනගෙ ප්‍රාණෙත්
දද නන්වන්න ගෙන ඇත බල-තල කාගෙත්

389. සමනල ප්‍රිය මිතුර දකිනා හැම දෙය ම
අදමිටු දන වෙසෙන-ගැවසෙන අප අත ර
බලමින - අසමින ද තොරතුරු කිරිපැටි ය
කවියට නගනු මිහිරෙන් - මිහිර ම ඇති ව

සමනලයා දුටු ඇත් පොරය
පනහමුරයෙ ඇත්රාජා 25

390. සැනසුම් ලබන්නට මත්තෙන් දිනිදු සැරේ
ගිවිසුම් නැති වෙලා වරිගයෙ එකෙකු පොරේ
විමසුම් සිහිවටන තැබු හැම දෙනා කෙරේ
උණුසුම් ඇත් පොරය සිදු වුණි පනහමුරේ

391. නම ගම පතල මඩුවන්වෙල රටේ මයා
අක්කර පණස් දහසක වන පෙදෙස සොයා
ඇත් ගාලක් කෙළේ විකිණීමට ද කියා
ප්‍රැන්සිස් මොලමුරේ තැන තතු ලියූ පියා

392. රජෙකුගෙ සිත කැකෑරුණි ඇත් වෙළෙද පොලේ
ගැබ් කරවමින් පර මුදලට වැටෙන වෙලේ
හිත් නැති නිවටයන් පසුපස ඇදුණු කලේ
නැව් කොමදෝරු උණ්ඩෙන් උහු නතර කළේ

393. ඉන්පසු ඇතුන්ගේ විකුණුම් පොලට ඇදී
සිටිවුන් වනයෙ හැම පැතිකඩකට ම වැදී
නිති කෙළිදෙලෙන් හිද පෙන්වා රළක පොදී
නිජ බිම ළං කළේ සෙනහස් පෙමක රැඳී

394. බලකොටු පවුරු බැද රැකි මුරපලේ එදා
බල සේනා බලය පණහක් මුරේ බෙදා
බල කාමුක ව රැකවරණය තැනූ යොදා
බල මහිමෙට “පනාමුර” නම හැදුණි සදා

395. බලයක වෙසෙයි බලගතුකම නියම කෙළෙන්
රජයන සමයක දි සිරිලක රදළ පෙළෙන්
අදිකාරම් කෙනෙකු වැජඹුණු ඉහළ දළෙන්
ඇති මන්දිරයෙ නටඹුන් දැක හැකි ය කැළෙන්

396. ඒ බිම් පෙදෙස තවමත් ගන වනන්තරේ
වනයෙන් ගැමි දනට සෙත ඇත නිරන්තරේ
හෙළ දැයෙ වටින දෑ රැකි පෙළ කතන්දරේ
“මඩුවන්වෙලයි දිසාවෙ රජ” සටන් පුරේ

397. වන පෙත අගය දෙන කරුවල-බුරුත කොටන්
අමුතු ම ලතාවක් දෙයි පැල්පතක පටන්
කෞතුක රසය වුව දෙන පර රටට තුටින්
මුව - මී - ගෝණ - වල් ඌරන් කරති සටන්

398. නෙත පොබ කරයි සිත මවිතය ගෙන දෙන්නේ
හිත නරතන රගයි දිය බුබුලන තැන්නේ
ගොතමින ගෙලෙහි බැදි මිණි කොතඹුව වැන්නේ
තෙත ඇති ගග - දොළට දිය බිදු දිව යන්නේ

399. රැකගෙන හිටපු “පවුලේ-කම” පිටට නොදී
පින් කළ ඇතාටත් බැරි විය මරු නො-වැදී
ඇත් රද සිහිවටන සේ පිළිරුවක හැදී
කදුළක් * “පනහ-මුර” ගම රදවමින් නිදී

(මතු සම්බන්ධයි.)

2025.02.01