ගසුත් නැවෙන වැලුත් සැලෙන සුළං කැරලි සුළි කැරකෙන
තවත් අඳුරු උදෑසනකි මේකුළු දහසක් කැටිවුණ
හිරුත් සැඟව ගොස් වෙනතක හොරැහින් මා දෙස බලමින
නමුත් මඟට පිය ඔසවමි, නොදනිමි කෙලෙසද නොගොසින

ළතෙත් බවක් නැති විලසින් ලොකු පොඩි මොර ගෙඩි තරමින
මමත් නොදත්තෙමි අහසක් මෙතරම් වැහි බිඳු වගුරන
ගඟක් සදිසි බොර දිය කඳ ගලමින් හොඳටම යටවුණ
මඟක් වුවද මම ඇවිදිමි කොහිදැයි කෙළවර නොදැනෙන

Photo credit;Noah Silliman


එදත් මෙවැනි වැහි දවසකි අහසත් පොළවත් ගුගුරන
ඔබත් මමත් පිය මැන ගියෙ එක කුඩයක් යට සතුටින
අදත් එමඟ නැත වෙනසක් වැහි දිය අඳුරට බොරවුණ
පලක් ඇතිද මේ ගමනෙහි ඔබත් නැතිව මා තනිවුණ


උතුරු කැළිෆෝනියාව