රන් ගොයම් තුරු ලපලු ලිය වැල් පීදෙනා
පුන් සදෙන් රැස් ගෙන නෙලුම් විල් පායනා
නන් දෙසින් මීදුම් මවා දිය වෑහෙනා
පින් බිමක් වී මා සොයා ආ වාසනා

ගිම් නිවා කවි ගී පබලු මුතු පාදනා
අවිදු දූවිලි වැකුනු සිත් මල් දෝවනා
සිත් පිනා දෙසවන් වසඟ කල ගායනා
මුදු බසක් වී මා සොයා ආ වාසනා

මිලින දිරි මල් පුබුදුවා සිහ නාදෙනා
ඝන තිමිර පට ඉරා අරුනලු සාදනා
කම්කටොලු සඟවා දරා දුක් වේදනා
මාපියන් වී මා සොයා ආ වාසනා