බුදු බව ලබන්නට පමණක් නොව මෙලොවේ
නිවනට යන්නටත් පින නොමැතිව බැරිවේ
සක්විති වෙන්නටද පින කුසලය මුලවේ
රැජිනක් රජෙක් වෙන්නෙත් පින් බලයෙන් වේ

නෙක රජ රැජිනියන් බිහිකළ ගුණ බලැතී
අප ලක් මෑණියන් තුම් කෙනෙකිය පිනැතී
බිහිකළ එයින් එක් රැජිනක් පිරි රුවැතී
සමුගෙන ගියා දුක දී සැමටම කැමතී

කලා ලොවේ නිළියක් ලෙස කිරුළ දරා
වැජඹුණු නිසා රැජිනක් විය යසස දරා
ඇය කළ මෙහෙය හද තුළ ගැඹුරෙහිම දරා
සිටි සැම දෙනා වැළපෙති නෙත කඳුලු දරා

රැජිනක් වුණා පමණක් නොව ලොවට කලා
මව්තුමියකද විය සැම දරුවනට කලා
ඔබ ගුණ දන්න සැමදෙන අද එකතු වෙලා
පින් දෙති ඔබට යන්නට සුර පුරය බලා

මැනවින් ගෙතූ මල් දමකට බඳුව සිටී
මාලනි රැජින අද නුඹ දිවි අතැර සිටී
ඔබ කළ නොයෙක් පින්පල කර ගෙනම කැටී
මැවිලා පෙනේ දෙව්ලොව සැප විඳින හැටී

රැජිනක් ගිය නිසා දැන් අඩුවක් ඇත්තේ
නව රැජිනක් අවැසි පුරවන්නට රික්තේ
රටවැසි සැවොම පින්කර ඇති බව සත්තේ
ළඟ එයි තවත් රැජිනක් කිරුළින් යුත්තේ

පෙර පින් බලෙන් ලද මුදු සුන්දර රුවැතී
පින් පිරි බිමක ඉපදී පිරි සොඳ ගුණැතී
රැජිනක් සතුව ඇති නෙක හැකියා පැවැතී
ලොවටම රැජින වී ඇය එයි සැක නොමැතී

මේ සිරි ලක පළමු රජ දහනෙහි ඉපැදී
ගුණදම් සාරදම් හා සමඟින් සුසැදී
සලසනු පිණිස පර සෙත සැමටම අතදී
දිරියෙන් සපිරි ඇය ගුණසේකර අනුදී

ලොවටම කෙසේ වුව අප සිරිලකට පොඩී
රැජිනක් දැනටමත් ඔබ අද අගය වැඩී
ඕනෑ නැත උඩට යන්නට තවත් පඩී
දැනටම ඔබට සැමදෙන ජය බඳිති කොඩී

රැජිනක් වෙන්න ඔබ පෙර කළ පින බලවත්
ඒ පින් බලෙන් වේවා සැමදා සැපවත්
නව ගහ අපල නෙක දොස් අනතුරු බලවත්
රෝ දුක් නොවේවා දිවි පවතින තුරුවත්


2025 . 05 . 27