ඒක සිදුවෙලා වස් .. දෙදාසකටත් වැඩියි.
රජ කෙනෙක් මුවෙක් ඒ .. කතාවේ සිටිනවා .

රජ මොලේ නැණ නුවණ..
අඹ ගහේ පැනයකින්...
මිහිදු හාමුදුරුවන්ගේ
අතින් මැනෙනවා.

ඒ මුවා ඇත්තටම ..
සිටියෙ නැත්තම් එහෙම..
දෙවන පෑ තිස් නිරිදු ..
වෙන සතෙක් මරනවා.

එහෙම සිදු වුණා නම් ..
ආ ගමන මග හැරී..
මිහිදු හිමි පිරිස යළි ..
දඹදිවට වඩිනවා.

******************************

වෙහස වී දුර ගෙවා ..
මිහින්තලය ට ගියා ..
මද අඳුරෙ ගලක් උඩ ..
තිත් මුවෙක් සිටිනවා.

""බොලයි හිත් ගුණ මකුයි ..
මළ පුඩුත් අටවලා ..
අපි මරාගෙන හොරෙන් ..
ඩෙවල් මස් බුදිනවා.

මහින්දාගමනයේ ...
මුල් පෙලේ හිටියාට ..
දැකල නෑ කිසි එකෙක්
මම අගය කරනවා.

උඹල ඔය බවුද්දා ගම්
කාරයන් වුණේ ...
අපි නිසයි " කියා ඌ..
මූණටම බනිනවා.


*********************************

බැලුවාම ඇත්තටම..
මුව කතාවෙන් ගන්න..
මහ ගොඩක් කාරණා ..
මගෙ හිතට නැගෙනවා.

කොහේවත් නොසිටි..
ගන කැලේ උන් අලි ඇත්තු..
පෙරහැරේ කරඬුවට ..
හැඩ රුවට අදිනවා.

කොයි දේත් රජවරුන්ගේ නමට ලිව්වාට.
හැංගිච්ච තව චරිත ..
ගොඩක් එහි තියෙනවා.

ඉතිහාස පොත් ඇතුලෙ..
මුවා වුණු මුවෝ ලෙස..
රජවරුන් හද හදා..
අපිත් ඔහෙ මියෙනවා.

********************************


2025.05.25.


.Photo Credit; Dylan Leagh