අද කෙලෙසකද ගෙවනුයෙ දිවි සතුට මැද
මැදහත් සිතින් විමසනු සිහි ඇතිව ඉඳ
ඉඳහිට නොවේ සැමදා මෙත් ඇතිව හද
හද හද අහර දී රැකි මව් නිසයි හොඳ

මව තුළ තිබෙන සෙනෙහස ඇට නහර බිඳ
බිඳ බිඳ නොවේ ඇට මිඳුළුද තුළට වැද
වැදගත් බවක් දී සැමදා සිටින සඳ
සඳ මෙන් සොමි ගුණය පතුරයි සිසිල මැද

යම් කිසි දිනෙක මව් පදවිය ලැබුණු ලඳ
ලද බොලඳියක ලෙස පෙර සිටි නමුත් අද
අදහස් එකතු කර වැඩිහිටි ගුරුන් මැද
මැදසිත් ඇතිව දරු සුරකී දුකද විඳ

රස ගුණ තිබෙන සුප් සහ බත් සමඟ කැඳ
කැඳවා දරුවො එක තැනකට සෙනෙහෙ මැද
මැදහත් සිතින් බෙද දී කුස පිරුණු සඳ
සඳ මෙන් දිලෙයි සිත පොපියන සතුට විඳ

සුමිහිරි කෑමකිය මී මැස්සන්ගෙ වද
වද දෙන ලෙඩට බෙහෙතක් ගත් වැනිය විද
විදහා සෙනේ මව කුළුණින් පුදන ලද
ලදරුව දනී කිරි කඳුලෙහි රසය සොඳ


2025 / 02 /15