කන්ද උඩ පොඩි පාසලට ගිය
පාර තවමත් තියෙනවා
සද්ද නොකරම පුංචි නා දළු
තවම අපි ගැන කියනවා

පිපුණු මල් පෙති මිලින වී ගොස්
පොළොව බිම සිප ගන්නවා
වෙර දරා කුදු බීජ රහසේ
එළිය දකිනවා ඇහෙනවා

දැල් ගහපු පන්තියේ තැන තැන
වවුලු රෑනක් වගේ එල්ලී
පාට කුඩ කරකැවෙනවා
කඳුලු වහලෙන් සැලෙනවා

තවත් මුතු මල් පොට්ටු පීදී
වේදිකාවට නැගෙනවා
උන්ට අත්පුඩි වැයෙනවා
පුංචි හසරැල් පිපෙනවා

පොළෝ දුක උහුලාන ගලනා
ගඟේ දියවර ඇදෙනවා
හීන්සතුටක් ලැබෙන තැනදී
අනේ පෙණ පිඬු නගනවා

රූං ගාගෙන දුවලා ඇවිදපු
විසල් කඳුවැටි සිහි වෙලා
ඇහැළ මල්වල නෙතඟ තෙමුණා
පෙතිවලත් බර වැඩි නිසා

හීන්කළුවර ගලා එනකොට
කණු උඩින් හඳ පායලා
දාහයේ ගිනි පබළුවැල් මත
විදුලිපංකා කැරකෙනා

තියෙන ගානක් රෝල ගහගෙන
කනවිටදි බඩ රවටලා
ගේ වටේට දුව දුවා කැව්වා
අම්මා බත්පිඩ අන අනා

කෙම් බිමක වැසි සොයා ගැනුමට
මතක පොත යළි පෙරලලා
ආ මගේ පිපි මල් දිහා දැක
තවත් අඩියක් ළං කළා
...
කන්ද උඩ පොඩි පාසලට ගිය
පාර තවමත් තියෙනවා
සද්ද නොකරම පුංචි නා දළු
තවම අපි ගැන කියනවා