අවලංගු කාසියක් වුණි මව් බස
පසුපස හඹාගොස් ඇහිඳගෙන
ඉගෙන ගත යුතුය දැන් ඉතින් මේ බස
වචන අමුණා කතා කරන රිද්මය

අතපය හසුරුවා ගොළු බස
කිව හැකි දේ ඇත සීමාවක
ජීවිතේ ඉදිරියටම යනවා නම් මේ රට
ප්‍රගුණකළ යුතුමය ඔවුන්ගේ බස

ආපසු හැරී බලද්දී ගෙවී ගොස් ඇත කාලය
හසුරුවා ඇත්තේ දෙකටම අතපය
ලේ දහඩිය වගුරුවා හොයා ගත්තට යුරෝ කාසිය
සන්නිවේදනය දුබලයි තවමත් වෙන්නේ අ වාසිය

ජීවිතේ ලං වෙලා සරත් සමයට හැලෙනවා කොළ එක දෙක
අනුගත වෙන්න බැරිවුණා, සංස්කෘතිය තවමත් දුරයි අපිට
මට හිතෙන්නේ වැරදුනේ අපිටමයි හිතපු නිසා නොපිටට
මේ තවත් මව්බිමකී හිතුවේ නෑ රික්තකයක් තියාගත්තා හැම විට

වසන්තයට කිට්ටුයි දැන් මල් පිපෙනවා දරුවන්ගේ හිස මත
ඔවුන්ට නුහුරු මගේ මව් රට ආපසු හැරීමක් නෑ මා උපන් රට වෙත
ජීවිතේ හොයන් ඇවිත් ජීවිතයේ අතරමන් වුනත් අපි දෙරටක
දැන් ඉතින් ඉඩ දිය යුතුයි ජීවත් වෙන්න දරුවන්ට මේ ඔවුන්ගේ මවු රට