කුසයට නැතිව අහරක්
සැරුවෙමි සොයා ගොදුරක්
සෙළවෙනු දුටිමි පඳුරක්
දැනුණේ නෙතට මිහිරක්

සෙළවෙන පඳුර වෙත පියවර තබා සෙමෙන්
නිතරම වැනෙන කොටි වලිගය තබා කෙලින්
එල්ලය ගතිමි තුරුවැල් දෙස බලා සොඳින්
පැන්නෙමි ගොදුර ඩැහැගන්නට බෙල්ල මුලින්

දුටුවේ කිසිඳු දින අමතක නොවන දෙයක්
සිටියේ පඳුර මැද සැඟවුණු මුවැත්තියක්
තිබුණේ කුසය මැද දඟලන කිරි කඳුළක්
දුටුවේ නෙතින් වැගිරෙන මවි සෙනේහයක්

ගැබ්බර මුවදෙන-
අයියණ්ඩියේ මා මැරුවට කමක් නැතේ
කිරි මණ්ඩියේ කිරි හැලිලා හතර අතේ
හිත් මණ්ඩියේ අමතන්නට කියා පුතේ
අයියණ්ඩියේ ආසාවක් ඇතිය හිතේ

බෝසත් කොටියා -
නංගියේ මමත් ඉපදුණෙ මවකගේ කුසින්
බණ්ඩියේ නටන දරුවා මම දුටුව සැණින්
නංගියෙ අභය දුන්නෙමි මම නුඹට තොසින්
මණ්ඩියේ ඉතුරු කිරි ටික රැකගනින් ඉතින්