රක්ත ධවල වර්ණ බොදව
විල් දිය මත පිපි සියපත්
දන්නවාද නොදන්නෙහිය
පත්ලෙහි විහිදුණු රොන් මඩ
පෙති මත එක බිදකුදු හෝ
යාංතමින් වත් නොරදන්
හිරු කිරණින් සැනසෙන්නට
සඳ කිරණින් බැබලෙන්නට
නොආව වග පිබිදෙන්නට

රෝස කුලේ සෙවුවන්දිය
දේදුනු පැහැ පරදවමින්
නටු අග විකසිත වූවද
දන්නවාද නොදන්නෙහිය
නටු මත කටු තිබෙනා බව
මිලාන වී යනතුරාම

සහසක් තරු කැට දල්වා
අහස් විලේ රාත්‍රියෙහි
පුන් පෝ දා උදාවෙත්ම
පුරහඳ පුරපස දිලුනේ
දන්නවාද නොදන්නෙහිය
පසු කර විත් අමාවකේ
ගන කළුවර පිය මැන බව
වළා අතර සැගවී සිට

දෙගොඩ තලා ගලාන යන
මහ ගං අතු ගංගාවල්
සරතැස විඳගනු නොහැකිව
වියැකී ඉරිතැලී ගියද
දන්නවාද නොදන්නෙහිය
ඉන් දවසෙක අත් මිදෙන්න
උත්සාහයක් නොදැරූ බව
ආමඟ උඩූගං බලාන
ගලාන යන්නට කිසිදා