හීන පොදි බඩ බැඳන් රෝස උයනට වැදී
රෝස කුසුමක් නෙළන් මවක ආයෙම වඩී
මායිමේ ඈ පෙනෙන නොපෙනෙනා ලෙස හිදී
පියෙකු විඳි විලිරුදා අකුරු මත නැත රැඳී

අරුණැල්ලේ ආ හිරුත් සවස මුහුදට පනී
වෙහෙස අග සියොතුන්ද කැදැල්ලක සුව විඳී
මහ රැයෙත් දහදියට සඳත් සුසුමන් පිඹී
වැඩ පලේ නිඳි නැතිව තාත්තා වැඩ ඇතී

මගුල්දා පෝරුවට යන දුවක අත රැඳී
කටුව වී නටුව මත මල රැකපු අත ඇතී
හදවතම කඩා තව අතක දවටන හැටී
කියා දුන් ඒ ඇසට කඳුළෙ හිමිකම නැතී

නිමක් නැති අහස් කුස හුදකලා තරු ඇති
දැවී ගිය මුත් පොරණ අදද එළි විහිදතී
වැඩ නිසා අතපසුව ගියත් මතකෙන් මිදී
කොහේ හෝ බිම් කඩක තාත්තා නිදි ඇතී