නගර උද්‍යානයේ ජනී ජනයා අතර

මාරගස් පෙළ අතර ගයමි ගී නිරතුරුව

ඔබ ඇවිත් හිඳ ගනී එකම එක වෙලාවට

දිරාගිය බැංකුවේ කෙළවරක හැමදාම

ගයමි මම අබිමනින් පියාගෙන යුග නයන

ඔබ ගැනම සිත යොමා බැඳුණු ගීයක් ලෙසින

ඔබේ නුවනග කැලුම ගීය ලෙස මතුව එයි

ඔබේ පියකරු වුවන ගී තනුව හා ගැටෙයි

නුවන මා නොගැටුනත් ඔබේ දෙනුවන සමග

දැනේ මට ඔබේ මුව මගේ දෙනයන ගැටෙන

පිවිතුරුම ගීතයයි ගැයෙන්නේ මා මුවින්

කිසිවිටක ඔබට නොහඟවන පද පෙළ තුළින්

-