මල් පිරිලා ඇති රතුවට එරබදු අතු අතර
කජු පුහුලන් පිරිලා ඇති අතු බිඳෙන්න විතර
මී අඹ පිරි ගහ මුදුනේ ඉඳන් මිතුරෙ නිතර
කොහෝ කොහෝ හඬ දීපන් සැරින් නොකර නතර

හිරු කුමරුට මුකවාඩම් වාරණ දෙත හැකිද
ඔහුගෙ ගමන නවත්වන්න නීති රීති ඇතිද
බක්මාසේ ළඟ එනවා ලොව වහගෙන නිදිද
අවුරුද්දට ගෙදර යන්න කොහෝ මගක් ඇතිද

ගුමු ගුමු ගා මීමැස්සන් හාදු දිදී රඟනා
පිපිලද මල් ගම පුරාම මිහිරි සුවඳ හමනා
පසුවෙන්නේ කාලයක්‍ය ලොවම දුකින් ගෙවනා
කිරි උතුරමු කොහෝ සුබයි නව අවුරුද ලබනා

තෑගි අරන් දෙමාපියන් බලන්න ගම යන්න
සහෝදරයො නෑයො එක්ක සතුට බෙදා ගන්න
රෝග ඇවිත් ගෙනා විපත් අමතක කරලන්න
කොහෝ නුඹට හැකිද මාව ගමට අරන් යන්න

කැවුම් කොකිස් මුං අලුවා කැවිලි රසට හැදෙනා
රබන් ගසා විනෝදවෙන වෙන මගුලක් නොවෙනා
දොළොස් මහක් දුක් විඳිද්දි එකම සතුට තිබෙනා
මට අවුරුදු ඕනා කියන් කොහෝ හඬින් ඇහෙනා