කාලයේ ඉරි මතින් මාරුවී ....

කෙහෙරැල්ල පද්දවා නිතඹ මත ලස්සන ට
මගෙ දෙපා පාර හරහා ඇඳුනු ඉරි මත ට
පිවිසේවි සිතාලා අසුරු ගසනා සැන ට
තිරිංගය තද වුණා නොදැනීම රියැදුරු ට

ගිම්හාන රස්නයට සැහැල්ලුයි කෙටි ගවු ම
වැසුනු නොවැසුනු තරම් පෙනෙන ඉඟ සුඟ කදි ම
හෙමින් ගමනක් නැද්ද ඇයි මෙසේ හදිසියෙ ම
ඔහු සිතනවා ඇතැයි සිතුණි මට ඉබේට ම

හිරු සමග පුරා හඳ තරුද දිලිහී නි වී
දින නැතිව දින පොත්ද කුණු කූඩයකට වී
දශක හතරක් තවත් දිවි මගට එකතු වී
තනිකඩව මම ගියේ ඉරි මතින් මාරු වී

හැරමිටියෙ වාරුවෙනි දැන් දෙපා නගන් නේ
නලවන්න උකුලු තල නැත මෙමා දරන් නේ
හදිසියක් නැතිව සැලෙනා ගතින් ඇදෙන් නේ
හෙමින් යන මා දිහා කවුද දැන් බලන් නේ