මල් බඳුන් සිසිල් පැන් රතු මේස රෙද්ද මත
හිඳ සිටිති නගරපති මැති ඇමති ප්‍රභූවරු
බහු වගට හිමි දනන් රැසකි නෙක බස් දොඩන
ඔවුනතර ලක් පුතෙකි නිරතුරුව හද ගැහෙන

එකින් එක හඬ ගසයි නුහුරු නුපුරුදු නමින්
නේක දන නැංග විට පිරිනැමේ සහතිකය
අතට අත දී නමා හිස නගා ප්‍රතිඥා
මල් පෝච්චිය රැගෙන මෙරට පුරවැසියකුව

ඇසේ සිංහල නමක් සැලෙන පා ඉදිරියට
අතැර යන ගමනක්ද ජනිත ලක් මව් දෙරණ
ඔබත් දැන් පිළිගැනේ ඔසී පුරවැසිකමට
බිරිතානි මහා රැජිණ නාමයෙන් දිවුරන්න

දුටු ගැමුණු රජුන් මෙන් වීරයකු වන්ට සිතු
ලක්දනට මෙහෙවරක් කරන්නට සිහින දුටු
නිදහසේ ඉගෙනුමේ ඵල ලැබූ ලක් පුතකු
ඔසී පුරවැසියෙක්ලු දේශප්‍රේමය එයලු