හේමන්ත , ගිම්හාන ,වස්සාන
ඍතුවල වෙනස්කම් නොසොයාම
සමකයට ආසන්න ..
දුම් ගසන කුස්සියෙන් එබෙන්නී..

හැඳිමිටෙන් කූරු ගා බත් හැළිය
බෙරි වෙන්න කළින් ඈ,
ජීවිතේ ලිප ගින්න සදන්නී..

රස්නෙදැයි කිසි විටෙක නොඅසනා
පුච්චන්න උපන් සැර ඉරක් යට ,
තබ තබා මිරිස්, දුරු, ගම්මිරිස්
පදම ඉක්මෙන්න පෙර..
ගෙට රැගෙන කුඩු කරන්
තුන පහට අඩු වැඩිය සදන්නී..
නේක මසවුළු යසට පිසින්නී.

සමකයේ ඉරට හරි කෙළින් යට..
වැලක් බැඳ ,..රෙදි දමා වනන්නී
කොට්ට මෙට්ට ද පැදුරු
ගස ගසා අව්වෙ දා
හෙට අලුත් දිනක් බව සිතන්නී...

ඉරට සැර විහිදීම ,
ඇතිවෙලා ගිය දිනෙක..
නන කැඩුණු කුඩ කබල
ප්‍රවේසම් කොට එහෙත් තබන්නී..
වැස්ස එන බව ඉවෙන් දකින්නී.

සමක ආසන්නයෙහි වෙසෙන්නී,
ඍතු වෙනසකින් නොම තැවෙන්නී ..