ඇති නැති කියා
දෙයක් ඇත
මුළින් එන්නෙ නැති ය
ඇති එන්නේ පසු ව ය
එන්නේ ම නැති පරදා
නැත්තට ම නැති කරන්නය
ඇති කොතෙක් ආවත්
ඇති වීමක් නැති
එහෙයින් නැති
නැති කළ නොහැකිය

විටෙක නැති කම හොඳය
සා ගිනි එවැනිය
දිගට උසුලන්න
කිසි ම සතකුට බැරිය

දැණු ම ඇති කම හොඳය
නැති කමත් විටෙක
නරක ම නැත
මන්ද දැනුම වැඩි තැන
නින්ද නැති කර
බිය සැක සංකා
ඇති කරන හෙයිනි

ධනය ඇති කම
පෙනෙන්නේ හොඳ වාගෙය
ඒ නැති කම දුක් දෙන ⁣නිසාය
එහෙත් ඉන් සරල කම
අල්පේච්ඡ කම
නිහතමාන ය නැති කර
බහුභාණ්ඩික කම
අහංකාර ය
ඇති කරනු ඇත
එහි දොස් නොදිස්නෝ
එමඟ යති හති දා ගෙන

ධනය ,
බලය ඇති කර
එනිසා ම
ආශාව රාගය වැඩි කර
අත් කළ යුතු ය
රැකවල් කළ යුතු ය
සිතුම් සිත ඇති කර
සිතේ නිදහසක් ඇතොත්
එය නැත්නැතට ම නැති කර
පේන මානයේ ඇති
සහන දුරු කර
අසහන ම වැලඳ ගන්නට
සිතට බල කරයි
අත් දුටු දනෝ
එය දැන දැන ම වුව
එහි ම ගිලී සිටිත්

බොහෝ දේ ඇති තැන
උසස් නම් ඇති ව්‍යාධි ද
ඒවාට බැට දෙන
බලමුළු හේවා පන්නයෝ
නිති සටන් අභිමුඛ ව
අවි අමෝරා සිටිති.

දැන් මැරෙන්ටත්
නිදසක් නැත
මෙ අත අත් හරිනු බැරි
ධනය හා බලය ය
රාග ද්වේශ මෝහ ය
තණ්හා පොදි ය
අනෙක් අත
අවි දරා ගත් හේවා පන්න ය
උන් තනන්නේ
මැරෙන්නට නොදෙන්න ය
ඒ උන්ගේ වාසියට ය

නැති එකාට
මැරෙන්නට නම්
නිදහස උපරිම ය
එල්ලී ඉන්න පොදි නැත
නවතන්න
සෙබලූ නැත
උන්ට ගෙවන්නට මිළ නැත
වෙන්න යන දේ ගැන
ලොකු දැනුමක් ද නැත
කොතන හෝ
ලොකු රිදුම් නැති නම්
(හිතේ වුව ගතේ වුව)
යන්න යන ගමන
ගෙදර යනවා වාගෙය

ඇති නැති කථා
බොහො ඇතත්
දැනට ඇති
එක හුස්මට ඇවිත්
මට හති
නැති කියා හිතුණොත් ඔබට
ඇති වෙන තුරා
බලා පිරිසිඳ සබඳ
කියන් මහට ද
ඔබ දුටු මා නොදුටු
ඇති නැති ගැන

04-05-2025