කුහුඹු රැල විසිරිලා යන
නියොන් එළි දිලෙන වීදියට
රසඳුනක් නොවූ අඩ සඳක
ගෙවී ගිය සඳ පළුව නුඹ

බඳුන් තුල පෙති විදා පිපුණු මල්
සුවඳ බෙදනා මැදුරු තුල
විල් මත ම රඟන නෙළුම් මල්
සොයා ලතවෙන බමර නුඹ

පාට සමනල් සලු පැළඳ
නුරා දල්වන ලියන'තර
ඔසරි නෙරියක ලලිත බව
කරන සිතුවම් ඇදුරු නුඹ

ඉරි ගසා පිළිතුරු ලියන
බහුවරණ ප්‍රශ්න පත්තරේ
ගැලපෙනා පද පේලි අතර තුර
නොගැලපෙන පදය තවම නුඹ

හතර වෙනි සතියෙ අන්තිමට
වීසිකර සියළු දුක් ගැහට
මුමුණමින් ගීයක් යස රඟට
ගමට යන රජ පැටිය නුඹ