බසින හිරු නැගෙන සඳු එක ඉමක පළඳන්න
ඒ මැදින් හිස් තැන්හි තරු කැකුළු රඳවන්න
නිල් රෝස සළු වියා සැන්දෑව පිළිගන්න
අහසකට පුළුවනිද මේ තරම් හැඩවෙන්න

සුදුත් නැති කළුත් නැති අලු රහස් සඟවන්න
ලතු දියර තවරගෙන ඉසිඹුවට සැරසෙන්න
දම් වළාවක කඳුළු රහසේම පිසලන්න
අහසකට පුළුවනිද දැහැනකට සමවෙන්න

අකීකරු සුළං රැළි සීරුවෙන් විඳගන්න
මංමුලා වූ විහඟ කැලට මග පෙන්වන්න
දරාගනු බැරි තැනක වැස්සක්ව සැනසෙන්න
අහසකට පුළුවන් ද මහ පොළව සිපගන්න