බත් උයන්නට තිබ්බ කුස්සියෙ හොදම මුට්ටිය ඉල්ලුවා
කොක්කනෙන් කිල්ලෝටෙ අරගෙන තැනින් තැන හුණු ගැල්ලුවා
රෙදියි පුළුනුයි ඔබා යහමින් එයත මෙයතත් පෙල්ලුවා
දොරකොඩම යටලීය අද්දර ඒක ඉන්පහු එල්ලුවා

අලුත් ගොයමේ වී කරල් මිටියක්ම එල්ලූ හැටි දැක
කිරිවදින්ටත් කලින් කැපු එක තමයි මයෙ හිතටත් දුක
හාල් අහුරක් මිදුලෙ ඉහලා උන්දැ වෙන්ටැති නැත සැක
දෙතුන් දවසක ඉදං පෙරමං බලයි හිද පිල පැත්තක

"අදත් නෑ නොවැ මැණිකෙ උන් ටික" අප්පච්චි කියනවා මුමුණා
ගේ කුරුළු රංචුවක් වෙනුවෙන් නැහෙන හැටි දැක පූදුම හිතුනා
ගෙයින් පිටමං වෙලා නොකියම ගොහිං උඹ හත් මසක් ගෙවුනා
ඒක ගැනනම් වගක්වත් නෑ ඒත් ඉකි බිදිනවත් ඇහුනා

ඉලත්තට්ටුවෙ බුලත් කොල ටික තබා කණපිට හරවලා
උන්දැ හීනෙක හැන්දයාමෙම කබල් පුටුවට බරවෙලා
දහදියෙන් බොදවෙලා අකුරුත් ලිපිය මෙතකින් නවතලා
ගිහින් එන්නම් හාල් අහුරක් මාත් මිදුලට වපුරලා