කදිම දුනු බැම මුදන හී සර වැදී පෙම් රණ භූමියේ
සුගම වුනු සේ තෙදැති දැහැනම බිදී යයි සොද මල්වියේ
රතු ම උනු ලය රෝස කුසුමින් සුව කරත් කැළලක් තියේ
නික්ම යනු මිස තවත් සටනින් පලක් නැත මේ වාරයේ

සටන දිනුවෝ උදම් සමරන ප්‍රේමයට හිමිවූ දිනේ
බමන හිස් ඇති පෙමක් සිස් අය වීදි වල සංදර්ශනේ
ගැහෙන ඉපැරැණි හදවතක ඇති අති මධුර සංසුන් සෙනේ
ගිමන නොම ගෙන කෙතෙක් සෙවුවද අතුරුදන් වූ බව පෙනේ

කාසි ගැටෙනා හඬින් පිපෙනා යොවුන් ගස් වල කැකුළු වේ
ප්‍රේමෙ නමිනා දිනක් වෙන් කර කැකුළු එකිනෙක මුකුළු වේ
ගැහෙන දැනෙනා හදක් නැතුවම සොදුරු දින සිස් සිතළු වේ
රහක් නොවෙනා මිනිස් හැඟුමට වැලන්ටයිනුත් විහිළු වේ