මගේ ආගම

දීප්ත ප්‍රනාන්දු - ඉතාලිය
දීප්ත ප්‍රනාන්දු - ඉතාලිය
2021-June

කුරුලනි පියාඹන නිදහසෙ නිල් අහසේ
සතුනි වෙසෙන මිහිපිට සතුටේ සුවසේ
මසුනි විඳින සුව නිල් ජලයේ පහසේ
ආගම කුමක් දැයි මට කිව මැන රහසේ

නිවන ස්වර්ගය අපාය නිරය ලෙසේ
වෙන්කර තිබේ ඔබ දහමට අනුව මෙසේ
සහතික නොමැති මුත් අදහමු වේය එසේ
නැති වුණොතින් බැරිවීවත් වෙයිද කෙසේ

පායන ඉර හඳත් තරුවක් වෙනස් නැතේ
එක වාතයයි බොන වතුරත් එකම වෙතේ
වෙනසක් නැතිව ඇට මස් ලේ එකම රතේ
ඇදැහිලි වෙනස අණුවන දැක්මකිය හිතේ

උපදින පවුල ලියවයි ආගමක් පොතේ
වෙනස සදන්නේ සිදුවන තැන උපතේ
නොසිතා බෙදී හෙලමින් තවකෙකු විපතේ
ඒ මත ගැටී යනු ඇයි බිම් යහන වෙතේ

මෙහි ආවොතින් පමණයි ගැලවෙන්නෙ පුතේ
කියනා සැමගෙ මුල් ඇදෙනා මුදල වෙතේ
යථිවර දහම් නොමිලේ දෙන කෙනෙක් නැතේ
දෙවි රූ පවා ඇත හිඟමනෙ නැතිව කැතේ

උපයා තුට්ටු දෙක වෙහෙසී බොහො දුකසේ
පුදදී රකිනමුත් පූජක කැළ සුවසේ
රකිනට මිනිස්කම නොම ගන්නා වෙහෙසේ
ප්‍රතිඵල සිටිමු විඳ ගනිමින් අද දවසේ

ගෙවමුව දිවිය යහපත කරමින් මෙලොවේ
කුහුඹුවෙකුටත් වරදක් නොවනට පොළොවේ
හැමවෙත ප්‍රේමෙයෙන් සිටියොත් තමයි ලොවේ
ලැබෙනුයෙ දිනුම මතුයම් දිනකදි එලොවේ

නවතා මිනිමැරුම කෙළෙසන ආගමෙ නාමේ
අරඹමු රකින්නට දිවි පතුරා සාමේ
මිථ්‍යාවෙන් මිදී අදහමු ආගම ධර්මේ
කිම වුව ලැබෙයි මළ පසු යහපත් උරුමේ