නුඹ දිනූ බිම නුඹට අහිමිද?

අරුණසිරි එදිරිසිංහ - පන්නිපිටිය
අරුණසිරි එදිරිසිංහ - පන්නිපිටිය
2021-November

හේනේ කුඹුරේ දහඩිය මුසු කරගත්තු
වැවු දිය සනහ ගත සුවපත් කරගත්තු
වෙහෙරේ විහාරේ දම් රස විඳගත්තු
සිටියා රටක පෙර මේ වැනි බෝසත්තු

මෙත් කරුණා ගුණය හද තුළ රුවාගෙන
තම සතු ධනය දුගි මගිනට බෙදාදෙන
මහජන මුදල් සංඝික දේ හිතාගෙන
රජ මැති දන වොරැඳි රට ගොස් ගසාගෙන

ඇසුවොත් ඇසෙන්නේ සිත කළඹන දේය
නොමනා සිරිත් හොඳ සිරිතට පැරදේය
වහලුන් දෙපිල කතිරය දී කළදේය
දෙපිලම එකට රජ සබයේ වොරැඳේය

ලක් මෑණියන්ගේ තිබු අඟපසඟ නැත
විකුණා මුදල් කර, ගත් ණය ගෙවනු ඇත
පරවෙණි දස් පිරිස ඇස් කන් පියාගෙන
උපදින පුතුනි, නුඹ දිනු බිම නුඹට නැත

මතකයි ටිබෙට් එස් මහිඳුන් ලියූ කවි
හද තුළ බුරයි ජාතික නිදහසේ සවි
කළු සුද්දා කරන විපතට දෙකට නැවි
ලක්මව රකිමු ගෙන කවියෙන් තැනූ අවි

*

සහන ලැබෙනතුරු ලංකාදීපයට
ගහන ගැහිලි හමුවේ සිහ වෙසින් සිට
නහන රුපුන් නහමින් යමි ඉදිරියට
මහනකමත් බන දහමත් එයයි මට

ඇතහොත් අකනිටායෙහි මුත් සැපෙක් ඉත
සිරිමත් නිදහස ම මිස වෙන දෙයක් නැත
මෙය සිත් රැගෙන වැඩ කොට ගිනි ගොඩක් මත
මැරුණත් මොකද එහි නොමැරෙන නමක් ඇත

(අවසන් පැදි දෙක එස් මහින්ද හිමිගේ නිදහසේ මන්ත්‍රය පද්‍ය කෘතියෙන් උපුටා ගන්නා ලදී)