නිහැඬියාව
2024-June
මහ පොළව දෙදරවන
පරිසරය කලඹවන
මහා හඬක් ඇසී මම
අවදි වුනෙමි තැතිගෙන
කෙසේ බිහි වුනි ද එවන් හඬක්?
භූ කම්පාවක්, සුනාමියක්, කුනාටුවක්!
බඳු සොබා දහමේ විකුර්තියක්
නමුදු එහි නැත මෙවන් බිහිසුණු බවක්
කෙසේ බිහි වුනි ද එවන් හඬක්?
යුද ගිනි මැද විලාපයක්, මහ පිපිරුමක්!
මහ වන මැද කොටි, සිංහ ගෙරවුමක්!
නමුදු එහි නැත මෙවන් රුදුරු බවක්
කෙසේ බිහි වුනි ද එවන් හඬක්?
කෑ මොර දෙන දේශපාලන වේදිකාවක්!
චන්ද පොරොන්දුවක්, හතුරු ගැරහුමක්!
නමුදු එහි නැත මෙවන් නිවට බවක්
අසාධාරණය, අයුක්තිය, අනීතිය
අබියස නැගෙන්නේ ඒ මහා හඬ මය
හැම තැන හැම විට එකම හඬ නිරතුරුව
ඒ මිහිකත නුහුලන සුදනන් ගේ නිහැඬියාව