ගුරු පඬුරු
2024-June
හිරුත් සමඟින් පිපෙන මල් වල
සුවඳ හදවත සිප ගනිද්දී
නුඹේ නොවනා පැටව් තුරුළෙහි
හොවා සිප්කිරි දිය පොවද්දී
හමා ඇදෙනා සුළං සිසිලස
විඩාබර නෙතු මත හැපෙද්දී
හෙළා දහදිය කඳුළු මුතු කැට
කළා නුඹ සෙනෙහස පිරෙද්දී
සැරට වේවැල රිදුම් දුන්නත්
වැටෙන නෙතු කඳුළැලි දකිද්දී
තිබුණෙ නෑ මයි හිතේ තරහක්
හදවතේ දුක සිර කරද්දී
අදත් මතකය අරන් ඉඳහිට
තක්සලා දොර ළඟ හිඳිද්දී
එදා වාගෙම තවම පුදුමයි
හීන ගස්වල මල් පිපෙද්දී
අමර සාමලා විදු බිමේ තව
අන්න අර සල් මල් නෙළද්දී
නුඹ කියා දුන් අකුරු අමුණමි
අදත් නැණ ගුණ දම් වැඩෙද්දී
නුඹත් නොමැතිව හෙටක් කොතනද
උගත් වියතුන් නම් දරද්දී
ගැලූ සෙනෙහස ලොවක් නහවයි
සිපිරි ගෙයි දොරගුළු වැසෙද්දී
ඉතින් අවසර නුඹේ සුවඳින්
සෙනෙහසින් ළය තෙමා යද්දී
තබා සිරසම දෙපා නමඳිමි
නුඹේ දෑසින් ලොව දකිද්දී
ඇඹිලිපිටිය ..