ශ්වෙතවන් කල්‍යාණ මලින් සැරසී එන්න
සොඳුරු පෙම් හීනයට ලඟට විත් පණ දෙන්න
අරුත්බර නැවතුමක සාර පල හටගන්න
හිඳිමි මං මඟ බලා වසන්තය අරඹන්න

වේදනා පොදි බැන්ද හදවතට අමතන්න
නැඟුණු හිරු උණුසුමින් මොහොතකට සැඟවෙන්න
සිනිඳු මල් පෙති අතර මට හැකිද හැංගෙන්න
ගිම්හාන කාලයට මා ලඟින් ඔබ ඉන්න

සුකුමාල හරිත පත් වෛවර්ණ ගන්වන්න
මලින් තොර තුරු ගොමුව සිසිලසින් නහවන්න
පෙමින් බැඳි පෙර දිනය මතකයට නංවන්න
සරත් කල පැමිණි වග මට හෙමින් මුමුනන්න

ලහිරු කිරණක්ව විත් හෙමි හෙමින් සිපගන්න
හද ගැඹුරේ සැඟව ඇති මිදුණු සිතුවිලි ගොන්න
එනතුරා ඔබ ඉතින් මගේ ළඟ නවතින්න
දින ගනිමි හේමන්ත කාලයට සමුදෙන්න

12.06.2017