නැතිබැරි එවුන් හැමදාටම තැලුනෝය
ඇතිහැකි උන්ට ක්‍රම සහ විධි පිරිලාය
ගැතිකම් කරන්නන් මුලු රට වනසාය
මිනිසුන් හොඳවුනොත් අවුරුදු හැමදාය

වියසනයෙන් ගරන්නන් වැහි වැහැලාය
අසමත් වුනත් බලයට තවමත් ගාය
අවිනිශ්චිත බවින් මුලු රට පිරිලාය
මගෙ අවුරුද්ද සත්‍යය ජයගත් දාය

පිටරට වැඩට ගියවුන් අසරණ වීය
සියරට එන්ට නොහැකිව උන් ලත වේය
විනිමය ලැබෙනතුරු නම් කිරි පැණි සේය
උන් නැති අළුත් අවුරුදු මොකටද ආය

පක්ෂය ජාති කුල මල පුද්ගල නාම
පසුපස ගියොත් වැනසෙයි අප හැමදාම
එක්වී සිටියහොත් ලක් දරු කැල සේම
ඕනැම ජගතෙකුට වුව දිය හැක ගේම

උස්මිටි නොහොදකම් හඳුනා පසෙක දමා
රැකගෙන මිනිස්කම විරසක ඉවත දමා
වැරදී ඇතොත් නිවැරැදි වී නොකර පමා
ජයගන්නවා සිකුරුයි රට ගොඩම තමා