අලුත් කවියක උපත අබියස

අනුර බී. සෙනෙවිරත්න
අනුර බී. සෙනෙවිරත්න
2021-October

හිරුට ඉස්සර දවස පිළිගෙන
උඳුපියලි පිනි පලස පාගන
ඔබේ මුව මත ඇඳෙන මඳහස
විඳින්නෙමි මම ඔබේ ළඟ හිඳ

මගේ උවටැන් නොඅඩුව ම ලද
ගෙමිදුලේ රතු රෝස පඳුරක
අලුත් මල් කැකුලක පහස දැක
නැගෙන මුදු හස විඳිමි ඔබ මුව

අවට ගස්වැල් අතුපතර හිඳ
වැයෙන සන්ධවනියක රස විත
නෙතු පියා නිති හරවමින් හිස
විඳින මඳහස් රුව විඳිමි මම

කමටහන් පරිකල්පනය වන
අලුත් කවියක උපත සිදුවන
ඒ අසිරිමත් මොහොත ළඟ බව
ඔබ අසල හිඳ හැඳින ගමි මම