ලන්ඩනයේ සිට මුදා හැරෙන ශ්‍රී ලාංකේය කවි සරණිය

විලි රැහැනට ඉකි ගැසුනා

2022-February

20/01/2022 එළිදැක්වුණු ”නව සඳේ පායන්” කාව්‍ය සංග්‍රහයෙන්

අඩු කුලයේ ශෝකාන්තය

2022-March

පුරාණ ගමේ වැදගත් තීන්දු ගනු ලැබූවේ මොහොට්ටාලලා, ගමරාළලා , විදානේලා වැනි ගමේ ප්‍රභූ පන්තිය විසිනි. ගමට අයිති වැවෙහි වතුර කුඹුරු වලට ලබා දිය යුතු ආකාරය තීරණය කරන්නේ ඔවුන් විසින් පවත්වන ලද සභාවක දීය .මුලින්ම වතුර දෙනු ලබන්නේ පරවේණි ඉඩම් ලෙස සැලකෙන මහා වෙල් පන්තියටය. දුප්පතුන්ට හෝ අඩු කුලයේ අයට පහළ වෙල් පන්තියේ කුඹුරක් තිබෙන්නට පුළුවන. නමුත් ඒවාට වතුර ලැබෙන්නේ පරවේණි ඉඩම් වලට වතුර ලබා දී ඉතිරි වුවහොත් පමණි. ඉඩෝර කාලවලදී ගමේ අහිංසකයන්ට මේ ඛේදවාචකයට මුහුණ දෙන්නට සිදුවේ.

ගම කරවන ගොල්ලන්ගේ සබාවේ
විදානෙලා ලොකු දේවල් කතාවේ
මැළවී ගොසින් ඔබ ආවේ මද්දහනේ
කතා නැති නමුත් දෑසේ කඳුළු දිලේ

පොල්කටු දෙක තුනක පැන් හිස් වුනා නමුත්
බත් පත නො අල්ලා හෝරා දෙකක් ගිහින්
නුඹේ හීය රැඳුනු එළිපත්තේ වරිච්චියෙන්
කඳුලක් හැලුනු නැති එක පුදුමයක් ඉතින්

අප්පච්චියේ මහ උන් මොනවද කීවේ
බැරි තැන පොඩි එකී ඇසුවා හීන් සැරෙන්
මේ කන්නෙටත් දිය නොලැබෙන හැඩයි දුවේ
මහ වැව අයිති උන්ටයි පොඩී අපට නොවේ

අහසත් ගිනි ලන්නෙ අපෙ පැල් කොට වලට
වැහි දිය පොදක් දුටුවේ නැහැ කල්පෙකට
අඩු කුලයෙ උන්ට විතරද මේ වින්නැහිය
මොනවා කරන්නද පූරුවෙ කල පවට

අතුරුදහන්‌ වූ කවියා

2022-December

කවියෙකි

පොත්‌ දැකුම්‌ වලදී හමු වූ

රඟහල කෙළවර අසුනේ හිඳිමින

මනමේ කුමරිට පෙම්‌ බැඳි

‘වීනස්‌ උපත’ ළඟ කලාගාරයේ

නිනර හමුවිය හැකි විය මේ කවියා

රන්‌ සළු දොවනා වෙරළ ඉමේ

පා සටහන්‌ කෙළවර පොඩියට දුටු

අවන්හල වසනා පැයේ

කුසලානෙහි අවසන්‌ බිඳ හා

සංවාදයෙහි යෙදී

දුන්‌ ඔහු නැත

අවසන්වර දූක ඇත්තේ

බගවන්තලාවේ කඳු ගැටයක්‌ කෙළවර

හුදකලාව

මීඳුම්‌ සළුවක පැටලී

දැන්‌ අතුරුදහන්‌ රටේත්‌ නැත

නගරය මැද එළිමහනේ

තරුණ තරුණියන්‌ එකාවන්ව

කිටි කිටියේ

සටන්‌ පාඨ නැත එහි

පොර කෑමක්‌ වාගේ උන්‌ උන්ම

දුරකතන රැහැන්‌ අවහිරවේ

ඇමතුමක්‌ යයි රහස්‌ මඟ

සුරාකන ලෙවකන

ලෙවකකා සූරාකන

අවලන්‌ පාහර නඩය තිගැස්සුනි

සඟවා තැබූ කඩු කිණිසි පොලු

පණ ලබන්නට ලඟය

පොලිස්‌ ඉවකරුවන්ගෙන්‌

ඇමතුමක්‌

සර්‌ මේක දේශපාලන ප්‍රශ්නයක්‌ නොවේ

පින්තූරයක්‌ උදුරා ගන්නට පොර කෑමක්‌

“මොනවා

මොකක්ද පින්තූරය ”

හොයාගන්න බැ සර්‌

පොර කාලා පොර කාලා

පොඩි කෑලි කෑලි කැඩිලා

“කවුද කට්ටිය”

අරගොල්ලො නෙවෙයි සර්‌

රසිකයො කියලා අලුත්‌ කට්ටියක්‌

“එහෙනම්‌ අතෑරලා දානවා

කොකටත්‌ සුදානමින්‌ ඉන්නවා”

ටික වෙලාවකින්‌

බුද්ධි අංශයෙන්‌ පණිවිඩයක්‌

සර්‌ අර පින්තුරේ

අතුරුදහන්‌ වුණා කියන කවියගෙ

පැහැර ගත් කොවුලිඳු

2023-April

සියොත් කැළ නැගී නුබ ගැබ සතර දෙසින්
බලත් කිමද නෑසෙනු ගී මිහිර ඉතින්
ඇවිත් ගදඹ දෙව් සරසවි සමග හොරෙන්
සනත් නන්දසිරි කොවුලිඳු රැගෙන ගිහින්

කෙසෙර නදකි නෙක කෙඳිරුම් හඬ අතරේ
ගැඹුර දුටිමු හිසපිරි සිප් නැණ සයුරේ
ඉතිර ගැලූ ළය මනුදම් දිය දහරේ
වැතිර නහනු කෙළෙසද යළි ප්‍රිය මිතුරේ

හෙළ ගී කෙතේ රන් බිජුවට වපුළ බැවින්
දුල පුන් සඳක් විය තරු රැස අතර නිතින්
නල වැල් පුරා මුහුවුණු ගී මිහිර අරන්
බල මැන පිපෙනයුරු කොඳමල් සතර අතින්

අමයුරු ගැයුම් අසනා රිසි තිදස ලියන්
සුමිතුරු ඔබව කැඳවා ගිය නමුදු ඉතින්
ලොව්තුරු සුව ලබා මෙත් බෝසතුන් වෙතින්
මහැදුරු තුමෙණි සැනසෙන් මතුදා නිවනින්

මෑණියනි

2023-May

නොයෙක් උපමා යොදා සමහරු තමාගේ ප්‍රේමිය වනන්නේ
දිනෙක මියයන තුරුම එකටම සිටින බව දිවුරා කියන්නේ
එහෙත් වෙනතක බැඳී ඒ සිත පළමු පෙම නොමරා මරන්නේ
මෑණියනි මුළු ලොවම ලැබුණත් ඔබ නොමැත දරු පෙම නසන්නේ

පණද දෙන්නට හැකිය කියමින් හොඳට රඟපා දමා මොත්තේ
එකම වහළය යටට ආ අය නිතර කෙහෙවලු පටල ගත්තේ
නැඟුණු ගැටලුව විසඳ ගන්නට පැතුවෙ සමහරු පිහිට කැත්තේ
ඔබයි මෑණිය දරුට ඇති පෙම කිසිදු දිනයක නොබිඳගත්තේ

ප්‍රේම කරනා තරුණ වැඩිහිටි නොයෙක් දෙන සැම තැනම ඇත්තේ
එහෙත් සමහරු පුංචි දේටත් ඔවුනොවුන් ඇන කොටාගත්තේ
සැබෑ ලෙසටම උන්ගෙ සිත් තුළ ආලෙ නොතිබුණ බවයි සත්තේ
මව්නි ඔබ තුළ තමයි කවදත් අචල ප්‍රේමය රැඳී ඇත්තේ

දස දහස් ගණනක් පහන් එළි මැඩ හිරුය ලොව බබුළුවන්නේ
හිස් අහස් කුස වසා ඇති තරු දුරැර සඳ තම එළිය දෙන්නේ
ලොව එළිය කළ හැකි වෙනත් එළි ඇතැයි මට නම් නැත සිතෙන්නේ
මගේ ලෝකය එළිය කළ හැකි මිණි පහන නම් ඔබම වන්නේ

ඉමක් නොපෙනෙන සසර ඇති දුක් බිඳ නිවන වෙත සැවොම යන්නේ
අසම සම ගුණ පිරුණ බුදුහිමි තමයි නිවනට මඟ කියන්නේ
නිමක් නැති දුක් කඳුළු නවතා මගේ දිවියට නිවන දෙන්නේ
පමණ නැති කරුණා ගුණෙන් පිරි සිතැති ඔබ යැයි මට සිතෙන්නේ

සුමිතුරන් හා සොයුරු වැඩිහිටි සබඳකම් සිය ගණන් ඔස්සේ
ගෙවා ආ මඟ තෙමී ඇත මා නොයෙක් වර දුක් කඳුළු වැස්සේ
සැමවිටම සෙනෙහසින් කුළුණින් මෙතින් ආදර පැන්ද ඉස්සේ
ඔබයි මෑණිය කෙලෙසකද මේ තරම් සෙනෙහස සිතට බැස්සේ

රාජකීය පණ්ඩිත
පූජ්‍ය පනාමුරේ තපස්සී හිමි
ලන්ඩන්

ළබැදි රත්න ශ්‍රී

2023-June

කවි ඉසිවරයෙකුගේ වරුණ…

2023-June

වල ගැසුණු දිවිමගේ අහිමිකම් දිරි කැන්දු
හෙළ පැදියෙ නියං බිම වස්සානෙ තෙත රැන්දු
පළ හැඟුම් ඉඟි රසින් පෙරා පන්හිඳ බැන්දු
දොළ පුරන රසික සිත ඉහින ගී කිරි බින්දු

රත්නයකි සහිත ගඟ පතුලෙ සිට ඔප වැටුණු
ස්වප්නයකි මවන ලොව කවි රටා හැඩ වැටුණු
සිප්විතකි තක්සලා ආදුරුස රස වැටුණු
අසපුවකි ඔබෙ මැවුම් දැහැනකට මග වැටුණු

සුදු නෙළුමකට එදා සොරබොරදි පණ පෙව්ව
විදු කැලුම සුනිමලයි දිනිඳු ලෙස ගී පව්ව
කඳු නොවී පාමුළ ම විලක සිසිලස කැව්ව
වඳු යුතු ම ඉසිවරෙකි කටු මතින් මල් මැව්ව

( ජුනි 02 වන දිනට යෙදෙන ආචාර්ය රත්න ශ්‍රී විජේසිංහයන්ගේ 70 වන ජන්ම දිනය වෙනුවෙනි )

කේ.පී.එස් සචින්ත්‍රා ,
හෝමාගම ,
ඉතිහාසය විශේෂවේදී ,
රුහුණ විශ්වවිද්‍යාලය .

ශ්‍රී රත්නය කව් තුමා

2023-June

ගිරි මුදුනට පායා එන අකුරු රුසිරු සඳ
පිරිසිදුවට සිත් සෝදන ඇදුරු මියුරු සොඳ
සිරි අසිරිය රසබර කළ සොඳුරු එ ගුරු හද
නිරිඳෙකි කවි වයමි ගදඹ මහරු කවිරු වැඳ

මුවරද වේ සුවඳම වේ රසය උරාගෙන
සවනොද වී ඇල්මෙන් වී
අකුරු උගෙන ගෙන
පැහැනද වූ කව් කියවූ
අසිරි සරාගෙන
නතරද වී නෙලුමක වී
වැවක ගුණයගෙන

නෙත් දෙකකින් හිත් එකකින් කියවා රස බස
පෙත් සහකින් ලෝ දැක
අප මැව්වා නෙක රස
රත්නය වී කව් නදියේ පත්ලෙන් එන ලෙස
සත් සියවසකට ගනු මැන මහරු ආයු කිස

ජූනි 2 වැනිදාට යෙදෙන රත්න ශ්‍රී විජේසිංහයන් ගේ ජන්ම දිනය නිමිත්තෙනි !

ආළවක යක් රජුගේ දියණියයි

2024-March

සේලා තෙරණිය

පෙර බුදුවරුන් කල කළ බෝ පින් ඇත්තී
සේලා තෙරණි ඉපැදුණි පුර හංසවතී
කුල මැදුරක වැඩී සම සරණයක එතී
අවුරුදු සිය ගණන් සතුටින් දිවි ගෙවතී

සැමියා මිය ගොසින් ගත දුබලයි වයසින්
උත්තම පින සොයයි ඇය හද දුක දරමින්
දිනයක එළඹ සම්බුදු බෝරුක වඳිමින්
ඉඳ ගති බෝධි පාමුළ කර තිර අදිටන්

සම්බුදු කෙනෙකු සිටිනේ නම් අසමසම
ප්‍රාතිහාර්යයක් මෙතැනදි විය යුතුම
ඇගෙ අදිටනින් සිදුවුණු දෙය නම් පුදුම
බෝරුක බැබලුණේ නෙක පැහැයෙන් කදිම

දොහොත් මුදුන් දී පෙළහර දැක පැහැදී
පේවී දින සතක් බෝ සමිඳුන් පුද දී
පහනින් පිදුවාය සත්වෙනි දින බෝධී
එපිනෙන් දෙව්මිනිස් සුගතිය මතු උපදී

අනුහස් බෙලෙන් බෝ මැඩ පතුරා එළියක්
දීපා ලෝකයෙන් සසරෙදි නැත අඩුවක්
දෙව්ලොව උපන්නත් වට විය මහ එළියක්
දිදුලයි තිඹිරිගෙය මව් කුස මිණි පහනක්

අප ගෝතම බුදුන් වැඩ සිටිනා සමයේ
ඉපදුණෙ ආළවක රජුගේ දුව ලෙසයේ
ආළවිකා කුමරිය යක් රජ පායේ
සේලා නමිනි අප ඇය හඳුනා ගනුයේ

බුදුන් ආළවක දමනය කළ දිනයේ
තබා පාසිවුරු රජු අත රැගෙන ගියේ
පියා සමග ගොස් ඈ බුදු බණ ඇසුයේ
දුක මඩිනා මගය සේලා ඉන් මතුයේ

දවසක් රහත් සේලා තෙරණිය සොඳිනේ
අන්ධවනයෙ තුරු සෙවනක වැඩ උන්නේ
පැමිණියෙ මාරයා එතැනට වෙන වෙසිනේ
තෙරණිගෙ නිවුණු සිත අවුලන පැතුමෙන්නේ

විපිළිසර නොවන්නට මතු අනාගතේ
කම්සුව විඳින්නයි ඇරයුම් කර ඇත්තේ
විෂ කටු සමයි කාමය රතියක් නැත්තේ
මරුවා පරදමින් තෙරණිය දම් දෙසතේ

කම් සුව නිසරුව දැක ලැජ්ජාවේ
අතුරුදහන් විය මාරයා සැණිනේ
පලසමවත් සුව විඳිමින් සිත්සේ
සේලා තෙරණිය අරමට වැඩියේ

ජාතික ගීය

2023-August

උස් නිදහස
අපේ ජාතිය
බලයෙන් ඉම්බ
උත්තර අපේ මව්බිම

හැත්තෑ පහක්
මාරුවෙන් මාරුවට
සුර විමනක් මැවූ
අභිමානවත් මේ බිම

අණන සුඛය විඳින
භෝගයෙන් ආඩ්‍යය
සුර සැප විඳින
දනන් ඇත තුටින්ම

ලෝකයම ණය
පාලකයන්ගේ විනය
එහෙව් රටක
ජාතික ගීයක්

හැදූ එකත් මරා ගත්තු
අමුතු රටක
වචනයක් වැරදීම
එල්ලිය යුතු වරදක්.