සියපත
වෙරදා ගොහොරු මඩෙනුත් එලියට පැන්නා
පෙරදා ජල දෙබෑකර හිරු බලමින්නා
රත් පැහැ බරින් වත මුකුලිත කරමින්නා
සැරදා තඹරු විල් දිය මත බබලන්නා
නිල් විල් ජලය රතු සහ සුදු වසාගෙන
මල් යායටම බඹරුන් අඬගසාගෙන
මල් පීරමින් එන මද නල උරාගෙන
සිල් බිඳුනිදෝ සියපත දෙස බලාගෙන
පැතූ සෙයකී බුදු පුදසුන මත ඉන්‍ට
බිතු සිතුවම් ද සෙල් කැටයම් සරසන්ට
ගෙතූ නෙළුම් මල් දම් ගෙල සරසන්ට
සිතූ ලෙස නිවන් දොරටුව හැරගන්ට
වියලා ගත් කලට දිව ඔසුවකි රේණු
උයලා කෙමිය, අල රස නහරෙහි පීනූ
බෙදලා නෙළුම් කොලයට බත් සහ මාලූ
දුරලා කුසේ ගිනි හැඬවෙයි රස සීනූ
විකුණා නෙළුම් මල් තම අඹු දරු රකිනා
වෙසෙනා බොහෝ වෙති නෙලුමට පින් දෙමිනා
ලැබෙනා එම පිනම කොතරම් දැයි සිතෙනා
අගනා නිදසුනකි කොයි කාටත් දැනෙනා
පියුම් සතක් මත සිදුහත් කුමරු සොඳ
වැඳුම් ලබා මෙලොවට පා තබන සඳ
ඇළුම් කළත් ලොව දහසක් කුසුම් මැද
නෙළුම් මලයි සැනසුනෙ පා පහස විඳ
පිරිලා සියපතින් රජරට වැව් පොකුණූ
ඔපලා සොබාදම් අසිරිය මන බැඳුනු
මැකිලා නොයයි රුව නෙත සිත මත් කෙරුණූ
මතු දා මෙත් බුදුන් පාමුලටද පිදෙනූ
පිපෙනා හැම මලම පරවී යන සේම
දිනනා සැමට උරුමයකිය මියයාම
දිලෙනා රුසිරු සුවඳැති නෙලුමක් සේම
දැනෙනා ලෙස අගෙයි හොඳ හිත පැතිරීම