සැප්තැම්බර්

කපිල කුමාර කාලිංග

2022-October

කඩා දැමුවෙමි
අගෝස්තු කොළය
දින දසුනෙහි
ඔන්න ඇවිත්
සැප්තැම්බර්
යළිත් ඇවිත්
සැප්තැම්බර්

කෙතරම් වැදගත් ද
සැප්තැම්බර්
සැප්තැම්බරයේ
උපන් කෙනෙකුට

මොනතරම් මතක
පිරිලා ද
සැප්තැම්බරය තුළ
හැම දවසක්ම
මාසයක් වගේ දිගයි

තව කොතෙක් සැප්තැම්බර්
ඉතිරි ද නොදනිමි මට
කුමට තැවෙමිද ඒ ගැන
උදාවුණා පමණයි තවම
අලුත් සැප්තැම්බරය මේ

සැප්තැම්බරය ඔබ
මවක් වාගෙයි මට
ජීවිතය පිරිනැමූ
ඇදුරියක හා සමයි
ප්‍රේමයේ මුලකුරු කියාදුන්

සැප්තැම්බරයමයි
වසන්ත කාලය
දිගාසිරි කුසුම්
මා වටා සුපිපෙන
ගෙවී යන නමුදු
මසින් මස මා දිවිය
ඇද වැළඳ සිපගනිමි
ළබැඳි සැප්තැම්බරය .

03 සැප්තැම්බර් 2022