ලන්ඩනයේ සිට මුදා හැරෙන ශ්‍රී ලාංකේය කවි සරණිය

සංසාර චක්කරෙන්

සංසාර චක්කරෙන්

දර්ශනී රණසිංහ
2023-May

හෙලෝ මගෙ රත්තරං-කෑවාද? බිව්වාද?
ඉන්න බෑ තවත්නම්
හෙටම මං එන්නම්
ඔයා බලලා යන්න

අනේ මං හිටියනම් – ළඟපාත, ආදරෙන්
තේ හදන් බත් උයන්
ඉන්න තැනකට ඇවිත්
කවනවා පොවනවා

දෙපැත්තෙම පෙම් වදන්
හැගුම්බර නෑ නිමක්

කෙරෙන තෙක් කසාදය
පසුද, තව දෙවසරක්
උතුරාවි ආදරේ – පෙම් ගීත ගයමින්
දෙන්න තුන් දෙනා වී
පිපෙනවා මල් හතක්
ටික කලක් ගතවෙනා – ජීවිතේ එලෙසමා

බොමුද අපි තේ එකක්
ළමයටත් තිබහ ඇති

ඹ්නනං තේ එකක්
හදාගෙන බොන්නකෝ
මට හරිම මහන්සියි
නිවපු උණු වතුර ඇති -ප්ලාස්ටික් ජොග්ගුවේ
ළමයටත් කිරි එකක් -හදල දුන්නොත් හොදයි

මව්පියන් වී මෙදා
ජීවිතේ විඳිනවා-ඇතැම්විට විඳවනා
ඉදල හිට කතා බස් පෙම් වදන් ගොළුවෙලා
සිනා පිරි මුව කමල-පරවෙලා විඩාවෙන්

ගෙදර කුලියත් මෙවර
වැඩිවෙලා තියෙනවා
ලයිට් බිල් වතුර බිල්
සේරමත් එක්වෙලා
ගේ කෑල්ලක් හදා
ගෙන ඉන්න යැයි සිතා
බැංකුවල ඇවිදිමින්
ණය ගන්න හදනවා

සති අන්ත නිවාඩුව
දුරකථන මුවාවෙන්
එහෙ මෙහේ පාවෙවී
දවස් දෙක ගෙවෙනවා
සෙල්ලමක් කරන්නට
කවුරුවත් නැති නිසා
පොඩි එකා තනිවෙලා
වීඩියෝ බලනවා
අනේ මේ දරුවාට
ඇස් ලෙඩක්වත් හැදෙයි
කිය කියා මව්පියෝ
දරුවටම බනිනවා

දරුවො ඇත ලොකුවෙලා
පාසලක් හොයනවා
දරුවාගෙ ඉගෙනීම
දෙමව්පියො කරනවා

දරුව උස් මහත් වී
පරස්තා හොය හොයා
රස්සාවකුත් සොයා
නිදහස්ම කරනවා

නිදහසක් කෝ අනේ
දරුමල්ලො එක්කලා
මේ ගොල්ලො උස් මහත් වෙනකනුයි මේ වදේ
කවද හෝ අපිට යළි නිදහසක් ලැබෙනවා
සිතුවාට නෑ එයත් පෙනෙන මානයකවත්

දරු මුණුබුරන් එක්ක
ජීවිතේ ගෙවනවා
නෝන ඉඳහිටල දැන්
පන්සලට ඇදෙනවා

එකම මන්තරෙ මෙලෙස
හැමදාම ජපවෙනා
සංසාර චක්කරේ
කොටසකුත් ගෙවෙනවා