සංසාරේ හැටි එහෙමයි…..
2023-June
දීපංකර පාදේ සිට ආවත් පෙරුමන් පුරලා
පෑහෙන්නෑ හැම දේමත් රන් රස වාගේ කැපිලා
පායන්නේ පුර සඳ වුව ගැළපෙන කණිසම බලලා
නෑ ඉන්නේ කිසිවෙකු ළඟ පෙර ණය මැකුණම ගෙවිලා
වලාකුළක සඟවාගෙන ජීවිතයේ හොඳම දවස්
මුදා හරිනමුත් පුබුදා මල් කෙමි මත තබා රහස්
සොයාගන්න බැරි තරමට දිය වී සුන්දරම හවස්
කුඩා කැබළි වී බිඳේද හද සනහා පිරුණ කලස්
ගෙනා ඉහළ කඳු සිරසින් පැවසූ නෙක කතා වැලක්
කියා පහළ නිම්නයකට ඇඬුවම ඉකි ගසා හුඟක්
බදා ගන්න හිතුවට හිත සනසා මක මකා දුකක්
මොනා කරන්නද මගතොට නවතිනු බැරි කලදි ගඟක්
බිම්‍බාවට හමුවුනාට සිදුහත් සසරේ පුරාම
පිං කාටත් මදි වුනාම නොලැබෙයි ගැළපෙන කෙනාම
ළං වූවත් සමහර හිත් අසිරිය දුටවේ ගියාම
සංසාරේ හැටි එහෙමයි එළඹෙන කලදී නියාම