මාවතේ කඳුළු මල
2022-May
රැඳෙමි තව එක් රැයක් කඳුලින්
දරා සත්මස් ගැබ පෙමින්
මහිමි අවසන් නින්ද නිදනා
සිව් රියන් සයනය පාමුළින්
මාවතේ රියසකට පරවුණු
තැලුණු වතමල දෙස බලන්
පෙති තලා ඉගිළුණු රියැදුරාණෙනි
කෝ පිතුසෙනේ මගෙපුතුට දැන්
පායනා හැම පුර හඳක් ගානේ
මෝරනා ගැබමත කණ තියන්
පුතු මුමුණනා ගී හඬ අසන්නට
ගෙට ගොඩවුණේ සෙනෙහස අරන්
ගැල අදින ගවරළ වුවද ඉසිඹුව
ලබන මහ රෑ නිදිවරන්
මගෙ ලැමට රන්කිරි පුරාදෙන්නයි
ගත දියකළේ දහදිය පෙරන්
සුක්කානමට වැඳ නුඹ යදින දෙවියන්
නැහැ රකින්නේ මග යන දනන්
මග ඉගිළිලා යනු එපා අයදිමි
හෙට උපදිනා මගෙ පුතු නමින්
මහ රැයේ බිළිඳෙකු අතින් ගත්
මෝහිණිය දවසක දුටුවොතින්
බිය නොවෙන් අරගෙන මපුතු දෝතට
දෙකොපුල් සිඹින් පිය සෙනෙහසින්