මානෙල් මල්
2022-November
මතකයෙන් බොහෝ සේ ඈත් වී
තිබුණු මානෙල් මලක් විල් තෙරක
යළිදු දුව විත් සිතට හදිසියේ
යොවුන් විය දැල්වීය අඳුරු ගැබ
වියපත්ව දිනක බටහිර රටක
සිහින දකිමින් එවන මව්බිමෙන්
සිටින සඳ දහස් සැතපුමක් දුර
විසිර ආයේය ඒ මල් සුවඳ
සිනහවක් වචනයක් නොලබා ම
මලක් ගිළිහී ගියේ මා අතින්
දෛවයද ඒ මැදට පැමිණියේ
නොයෙක් වර අසන්නට සිතුනි මට
එදා මෙන් නැවත මම තනිවීමි
ජීවිතය කාරුණික නොවේ මට
ගං දියක පිදුරුපත් ළඟට විත්
යළිදු පාවී යාය දෙපසකට
ජීවිතේ බොහෝ දේ අත හැරී
හැඬේන මුත් මා ගැනම දුකින් සිත
මලක් යනු නෙලාගත් කාට හෝ
සුවඳ මිස අන් කිසිත් නොදෙනු ඇත