නූපන් දරුවන්
2021-July
වෙන්නට මවක් පෙරදා ඇය පැතු සිහින
තුන් වන වරට බොඳවී මල් ලෙස මිලින
පැතුම් ගිලිහුනිය ලේ මස හැර විමන
මහමෙර පතිත වුනි ඇයගේ හිස මුදුන
දිවා රැයේ වෙනසක් නැත ඇය දුටුවේ
කලුවර මිසක එලියක් ඇය නැත පැතුවේ
තනිවම හැඬූ කඳුලුත් දෝරෙම ගැලුවේ
දෝං-කාර සුසුමන් ගුවනෙදි හමුවේ
කාලය ඉගිලුනා ඇයටත් හොරාවට
වියපත් බව ඇවිත් නොකියා ගේ දොරට
පාලුව තනියමත් නිවසේ පුරාවට
නූපන් දරුවො සිහිවේ ඒ වෙලාවට
පින් මදි වුනේ නුඹට ද ඉපදෙන්න පුතේ
මගේ පව් වලින් පින් යටපත් වෙලා සිතේ
මැරි මැරි ඉපදෙනා සසරක් අපට ඇතේ
පිළිසිඳ ගන්න ඈ කුස මතු බවයෙ පුතේ