නිමා නොකරමි නුඹේ සිතුවම…
2022-November
ගෙවා මෙතුවක් නෑර දවසක්
නොනිමි සිතුවම නිම කරන්නට
මසිත මැළිවනු කිමැයි නොදනිමි
මන්දහාසිනියේ
මෝනලීසා නුඹේ සිතුවම
කෙළෙස ඔහු හට රැගෙන යන්නට
දෙම්ද හෙට දවසේ
දෙනෙත් දල්වා මගේ අබියස
බලා උන්නත් නඟා මදහස
දෙතොල් පෙති සිරකරන රහසට
කල් බලමි රහසේ
මෝනලීසා නුඹේ සිතුවම
නිමා නොකරම තබාගමි මම
පාළු මගෙ කුටියේ
අවසාන තෙලිතුඩු පහර වියැලී
මවෙත නුඹ යළි නොඑන හෙට දින
කෙසේ ඒ දුක දරාගන්නද
ඉකිගසා අඳුරේ
මෝනලීසා නුඹේ සිතුවම
බලා සැනසෙන මහද දෙවොලින්
නොයන් මතු දවසේ