ගෙදර හිටපල්ලා
2021-January
මිහිතලය ගිනි තියන කොරෝනා වයිරසේ
කිසි අදිසි බලවතෙකු නොදුටුවෙද ඇයි කෙසේ ?
වැඳ පුදන, උඩ බලන අපි අපගෙමයි දොසේ
අපි රකින දෙවි වරුන් වැජඹුනෙද කොයි දෙසේ?
මහ සයුර වියරු වී මිහි මතට ගලා ගිය
මතකයිද සොළොස් වසරකට පෙර සුනාමිය
මැරුන උන් ජාති, ආගම් අනුව බෙදාපිය
හෙළ, දෙමළ, යෝනක ද බලාපිය, කියාපිය
සුදු පාට, කළු පාට, ගුරු පාට කහ පාට
මිහිතලයෙ නන් වෙසින් අපි පැතිර හිටියාට
රජ මැදුර ,අතු පියස මොන වෙනස තිබුනාට
එක ලෙසයි සොබාදම සැලකුවේ “මිනිසාට”
බොදු, කිතුනු, හින්දු, මුස්ලිම් කියා බෙදා හැම
ඇති නමුදු ඉරණමකි සැමට එක විලාසෙම
ඊයෙ, අද මෙන් හෙටද මිහිතලේ සදාටම
එකම දහමකි අපට ඒ තමයි “සොබාදම”
බුදු සමිඳු, කිතු සමිඳු, සිව දෙවිඳු, අල්ලා
පල කිමද යැද නොදෙන පිළිසරණ ඉල්ලා
පොලීසිය කියන ලෙස පිටට නොගිහිල්ලා
අඹු දරුවො බලාගෙන ගෙදර හිටපල්ලා.