ලන්ඩනයේ සිට මුදා හැරෙන ශ්‍රී ලාංකේය කවි සරණිය

ඉසිපතනයෙන් නැගි ධම්මාලෝකය

ඉසිපතනයෙන් නැගි ධම්මාලෝකය

ඒ .පී.ඒ. විජයන්ති මාලා - අකරවත්ත- මූණමල් දෙණිය
2021-July

ඇසළ සැණකෙළි දකිනු රිසියෙන් දිනිදු පායා නැගෙන්නේ
සසල බිඟු කැළ සුපිපි මල් සිප රසැති මී වද බදින්නේ
නිසළ නුඹ ගැබ සරන සියොතුන් ගයන ගී නඳ ඇසෙන්නේ
විසල වාසල දොරටු ඇරිලා කිමද කොළහල කරන්නේ

මෙතැති දේවිය මහාමායා වැතිර සිටියා සිල් අරන්
සුදැති ඇත් පොව් පිවිසියා කුස තුළට පියුමක් සොඩ දරන්
නැණැති බමුණන් ගෙන් අසාරජු සිහිනයේ තතු සිත් දරන්
පිණැති කුමරෙක් දේවි කුසහොත් බව කියා ඇත ගෙන වරන්

සුද්ද සුන් නිරිදුන්ට දාවූ කුමරු සිදුහත් නම් වුණා
සියල් සිරියෙන් නොඅඩු රජ සැප ලැබී කාලය ගත වුණා
කල්ප ගණනක් පිරූ පෙරුමන් ඇසළ පෝදා මතු වුණා
පුතු රහල් සහ දේවි බිම්බා දමා පැවිදිව තනි වුණා

දුක නිවාලන සැපත කොතැනද නැවති ඉන්නට සසර ගමනින්
ඇවිද්දා ගම් දනව් අතරින් ගෙවෙන තුරු ගව් දහස් ගණනින්
නුවණ ලැබුවා එකළ දඹදිව සමණයින් දෙසු දහම් පහනින්
නමුදු නොලැබී ඇත සෙවූ මග රිසිසෙ අත් විදගන්ට මෙතැනින්

අරි අටගි මග යමින් බෝසත් පෙර පිරූ පෙරුමන් බලෙන්
ඇත්ත සතරක් සොයා ගත හැකි වීය කෙළෙසුන් දුරු කළෙන්
මෙදම් මග කාහටත් කියලා මුදා ගන්නට රුදු වලෙන්
වැඩිය බරණැස ඉසිපතනයට මගුල් බණ දෙසනා දොළෙන්

ඇසළ සදවත නැගෙයි අහසේ මගුල් බණ අසනා රිසින්
සුරන් අගනන් එක්ව ගගනත සුපිපි පරසතු මල් ඉසින්
මහණ පස්වග සමග සාවුන් මුවන් වන ගණදුර පිසින්
මගුල් දම් සක් වයත් ගව්තම බුදුන් වැඩ හිද එක් පසින්