ලන්ඩනයේ සිට මුදා හැරෙන ශ්‍රී ලාංකේය කවි සරණිය

ඇය ද නදියකි

ඇය ද නදියකි

චන්ද්‍රලාල් ද සිල්වා - තොටගමුව
2022-October

කිඹුලන්ට හිතු මතේ
ඔබ මොබ පීනන්න
ගං ඉවුරෙ සැතපිලා
හිරු රැසින් නෑවෙන්න
පතුලටම කිමිදිලා
ජීවිතේ විඳගන්න
නිල්වලා ගඟ වගේ
අඩු නැතුව ඉඩ දූන්න

ඉහල පොද වැස්සටත්
පහල දෝරේ ගලල
කෙසෙල් කොට පාරු උඩ
පැද යන්න පුරුදුකල
නොගැඹුරු ගංවතුරෙ
කිමිදෙන්න ඉඩ දුන්න
බොළඳ කුතුහලය හළ
දඟකාර ගිං නදිය

කැරකි කැරකී කඳු වලල්ලේ
එති එතී ගල් කුළු වටා
පළුදු රළු ගති ගෙවා දමමින්
හැඩ කලා කඩතොළු මකා

නොබා හඹා ගිරි හෙල් කඳු වැටි නිම්න
වෙහෙස නිමා විය හමු වූ පසු තැන්න
උනා දුහුලැඳුම් කැත කුණු කිලි වැකුණ
පහන් සිතින් ඇඟ ලා සළු පිළි ධවල

නසා මෝහය නිවා දාහය
ශ්‍රෝතයෙන් වීරිය වඩා
දානයේ පාරමී පිරුවා
බෙදා කරුණා ගුණ දයා

ගලා යන්නී නිසසලව ඈ
සසර සයුරේ ඉම සොයා
සපථ කරමින් පුළුල් නදියක
නිහඬ පරිනත ගති සොබා