අරගලයේ ප්‍රේමය
2022-June
ඔබව දුටු මුල් දිනේ මා හද ප්‍රේමයෙන් සසලව ගියා
අරගලෙන් හති වැටුණු සියොළඟ නව ජවයකින් පිබිදුණා
මා සමග ඔබ සිනහ වූ විට කඳුළු වායුව පැතුරුණා
ඔබේ පියකරු මුහුණ වසමින් සුදු දුමක් පැතිරී ගියා
කළු දුමෙන් අහසම වැසීගිය දිනක ඔබ සොයමින් ගියා
කඳවුරේ හෙම්බත්ව සිටි ඔබ නෙතට කඳුලක් නැංවුවා
මැර පහර එල්ලවූ ඒ දින ඔබ සොයා මා දිව ගියා
පාර කෙළවර හතිලමින් උන් ඔබව දුටු මා සැනසුණා
ගාලු මුවදොර මහ මුහුද සේ හදේ පෙම්රැළි පෙරලුණා
අවට ලෙළදෙන සිංහ කොඩි සේ සිත් අහස කැළඹී ගියා
විගසකින් අප පැතුම් ඉටුවී අරගලය ජයගත් දිනේ
සැබෑ වන බව දනිමි සොඳුරිය අපේ සිහිනය ජීවිතේ
21/05/22